Gæðastefna

Í Verkmenntaskóla Austurlands (VA) er unnið eftir einkunnarorðum/gildum skólans sem eru samvinna, þekking og árangur. Í skólastarfinu er leitast við að veita góða kennslu, auka víðsýni nemenda, hvetja til gagnrýninnar og skapandi hugsunar, efla samvinnu og tillitssemi og hvetja til virðingar fyrir umhverfi og samfélagi. Áhersla er lögð á að VA sé góður skóli fyrir alla nemendur sem hann sækja en það felur m.a. í sér eftirfarandi:

• Að skapa jákvætt og styðjandi námsumhverfi þar sem ríkir gagnkvæm virðing, jafnrétti og umburðarlyndi, í samræmi við grunnþætti menntunar.
• Að tryggja jöfn tækifæri allra nemenda til náms og veita viðeigandi stuðning með hliðsjón af þörfum hvers og eins.
• Að bjóða upp á fjölbreytt og sveigjanlegt nám sem mætir ólíkum áhugasviðum og hæfileikum nemenda og tekur mið af þörfum atvinnulífs á Austurlandi.
• Að efla ábyrgð nemenda á eigin námi og stuðla að virkri þátttöku þeirra í skipulagi og framvindu náms.
• Að hlúa að þekkingu, leikni og hæfni nemenda og efla gagnrýna og skapandi hugsun, víðsýni og samvinnu.
• Að tryggja faglega og fjölbreytta kennsluhætti og námsmat, með skýrum kennsluáætlunum og reglulegri endurgjöf til nemenda.
• Að stuðla að góðum námsaðstæðum og aðlaðandi námsumhverfi, bæði hvað varðar aðstöðu og búnað.
• Að styðja við faglega þróun starfsfólks og hvetja til endurmenntunar og þátttöku í þróunarverkefnum.
• Að efla tengsl við samfélag, atvinnulíf og aðra skóla á Austurlandi og stuðla að samfellu milli skólastiga.
• Að stuðla að heilbrigði og velferð nemenda og bjóða upp á tækifæri til þátttöku í jákvæðu og uppbyggilegu félagslífi.
• Að rækta ábyrgð og virðingu fyrir umhverfi og samfélagi.
  
  

Gæðaráð

Gæðaráð samanstendur af stjórnendum skólans, ásamt kennara af verknámsbraut og kennara af bóknámsbraut. Hlutverk gæðaráðs VA er að fylgja eftir gæðastefnu skólans.

Gæðakerfi Verkmenntaskóla Austurlands

VA styðst við ISO 9001 gæðakerfi og ÍST 85 jafnlaunakerfi fyrir alla almenna starfsemi VA. Kerfinu er ætlað að lýsa starfsemi skólans og felur einnig í sér að unnið sé eftir settum vinnureglum. Stefna skólans er að gæðakerfið sé lifandi og í stöðugri þróun en liður í því er að allt starfsfólks skólans, nemendur og forráðamenn séu meðvituð um gæðastjórnun og gæðaeftirlit skólans.
Gæði skólastarfsins eru markvisst bætt með reglulegri eftirfylgni gæðamarkmiða og mælikvarða sem veita skýra mynd af stöðu mála hverju sinni, svo sem árangri, ástundun, líðan og ánægju nemenda og starfsfólks. Á innra neti skólans er gæðahandbók á rafrænu formi.

Myndin hér að neðan sýnir með einföldum hætti hvernig kröfurnar úr gæðakerfinu eru settar fram.

Síðast uppfært 10. júní 2026