Á hverri önn er framkvæmt áfangamat sem veitir kennurum niðurstöður um stöðu sína og gefur nemendum tækifæri til að láta í ljós skoðunu sína á kennurum og kennslu í einstaka áföngum í skólanum. Er tilgangurinn matsins að kanna hvernig hafi tekist til með það að markmiði að bæta það sem betur mætti fara.
Áfangamatið var framan af framkvæmt í gegnum SurveyMonkey en frá haustönn 2018 notast við Innu við framkvæmdina. Framkvæmd áfangamats er í höndum gæðastjóra. Niðurstöður áfangamats eru kynntar kennurum og skólameistara að áfangamati loknu og ræðir skólameistari niðurstöður við kennara eftir því sem tilefni er til. Einnig fer gæðaráð yfir heildarniðurstöður áfangamats hverrar annar og þær kynntar á starfsmannafundi í annarlok.
Samkvæmt verklagsreglu sem verið er að innleiða varðandi áfangamat þá skal hver áfangi metinn að jafnaði á 18 – 24 mánaða fresti. Því getur þurft samanlagt fjórar annir til að fá meðaltal fyrir alla kennda áfanga í VA. Með notkun Innu við framkvæmd matsins frá hausti 2018 hafa þó allir áfangar farið mat á hverri önn.
Eitt þeirra gæðamarkmiða sem sett hefur verið í VA er mælt í áfangamatinu og er það svohljóðandi:
- Að nemendur séu ánægðir með kennslu og aðstöðu til náms í skólanum.
Mælikvarðarnir gagnvart þessu markmiði eru tveir:
- Á heildina litið er ég ánægð(ur) með kennsluna í áfanganum.
- Aðstaða til náms og kennslubúnaður (t.d. kennslustofa, tæki og tól) í áfanganum er viðunandi.
Markmiðið er að 85% nemenda taki afstöðuna frekar sammála eða mjög sammála gagnvart þessum fullyrðingum.
Þrjár útgáfur af áfangamati eru lagðar fyrir; áfangamat fyrir staðnámsáfanga (geta verið blanda af staðnámi og fjarnámi), áfangamat fyrir fjarnámsáfanga og áfangamat fyrir áfanga með fimm eða færri nemendum. Í síðast nefndu útgáfunni eru engar opnar spurningar lagðar fyrir til að koma í veg fyrir að hægt sé að rekja svör til einstakra nemenda.
