Helstu upplýsingar um VA

Af hverju ætti ég að velja VA?

VA er lítill og persónulegur skóli með fjölbreytt námsframboð. Það er haldið mjög vel utan um alla nemendur og í skólanum er hægt að blanda saman bóklegu og verklegu námi.

Langar þig að taka stúdentspróf ? Þá er nám á náttúruvísinda, félagsvísinda- eða opinni braut málið fyrir þig. 

Langar þig að fara í iðn- og starfsnám? Þá getur þú valið á milli náms í húsasmíði, rafvirkjun, vélstjórn, vélvirkjun, skipstjórn, hárgreiðslu, leikskólaliða, stuðningsfulltrúa eða sjúkraliða.

Langar þig að blanda saman stúdentsprófi og iðnnámi? Þá er VA skólinn fyrir þig.

Kynnstu náminu í VA - Námsbrautir 

Í VA er boðið upp á fjölbreytt nám. Ef þú vilt lesa þig til um námsbrautir okkar finnur þú nánari upplýsingar hér.

Hvernig er skipulag námsins/kennslufyrirkomulag?

Skipulag námsins er þannig að á mánudögum eru einungis áfangatímar. Fyrir hádegi á þriðjudögum, miðvikudögum, fimmtudögum og föstudögum eru einnig áfangatímar. Eftir hádegi þá daga eru vinnustofur þar sem nemendur velja sjálf í hvaða stofu þau eru og hvaða verkefnum þau vinna að.

Hvernig er félagslífið í VA?

Nemendafélagið í VA heitir NIVA. Nemendafélagið stendur fyrir allskonar viðburðum yfir skólaárið, þar má nefna ýmsa fasta viðburði eins og VA-bolta í íþróttahúsinu, árshátíð, austfirsku ólympíuleikana, kærleiksdaga. Ýmsir minni viðburðir eiga sér stað þess á milli s.s. spurningakeppnir, bíókvöld, bílafeluleik og fleira sem auglýst er fyrir hvern mánuð í senn.

Skólinn tekur einnig þátt í Gettu-betur og söngkeppni framhaldsskólanna.

Eruð þið með leikfélag?

Leikfélagið Djúpið var stofnað árið 2005 og hefur sett upp ýmsar leiksýningar síðan, meðal annars Cry baby, We will rock you, Grease og Mamma Mia.

Vorið 2025 setti félagið upp söngleikinn Heathers og vorið 2026 verður leikritið Þrek & Tár sýnt í samstarfi við Leikfélag Norðfjarðar.

Hvað eru margir nemendur í VA?

Fjöldi nemenda í dagskóla er breytilegur en er yfirleitt í kringum 120 nemendur. Í fjar- og dreifnámi eru svo um 300 nemendur að auki. Við erum fámennur og góður skóli sem gerir það að verkum að kennslan, umhverfið og þjónustan er persónuleg og góð.

Ég hef áhuga á iðnnámi en vill ljúka stúdentsprófi líka, er það hægt?

Já, það er hægt. Það er til dæmis hægt að ljúka námi í iðngrein og bæta við viðbótarnámi til stúdentsprófs. Ef þú vilt hinsvegar fara á stúdentsbraut en hefur áhuga á iðnnámsgreinum, þá er hægt að taka áfanga í iðnnámi í frjálsu vali á stúdentsbrautum.

Ég er með námsörðugleika, hvaða þjónusta stendur mér til boða?

Þjónusta náms- og starfsráðgjafa skólans inniheldur meðal annars fræðslu og aðstoð vegna námsörðugleika. Gott er að leita til náms- og starfsráðgjafa til að finna út hvaða þjónusta og aðstoð hentar best.

Allar nánari upplýsingar um náms- og starfsráðgjöf í VA má finna hér.

Hver eru inntökuskilyrði?

Nemendur með A, B+, B, C+ og C á grunnskólaprófi geta innritast á allar námsbrautir skólans. Nemendur sem lokið hafa kjarnagreinum grunnskóla með A, B+ og B hefja nám á 2. þrepi í þeim greinum. Nemendur með einkunnina C+ og C raðast að jafnaði á 1. þrep. Nemendur sem ljúka kjarnagreinum með D hefja nám á framhaldsskólabraut.

Hvernig sæki ég um nám?

Sótt er um nám í VA í gegnum umsóknarvef Ísland.is. Nánari upplýsingar um tímasetningar umsóknarferlis má sjá þar. Umsóknir í dreif- og fjarnám fara fram í gegnum heimasíðu VA og auglýst sérstaklega á heimasíðu skólans þegar opnað er fyrir umsóknir þar. Einnig er hægt að hafa samband við áfangastjóra eða náms- og starfsráðgjafa varðandi umsókn.

Er heimavist í VA?

Já, heimavist er við skólann og er hún ætluð nemendum sem stunda fullt staðnám. Á heimavistinni eru 29 tveggja manna herbergi, hvert með sér baðherbergi. Á hverjum herbergisgangi er eldhúskrókur með örbylgjuofni og ísskáp. Í sameiginlegu rými er setustofa, sjónvarp, poolborð, borðtennisborð, matsalur og rúmgott anddyrri.

Sjá nánari upplýsingar um heimavist hér

Er mötuneyti í VA?

Já, í bóknámshúsi skólans er mötuneyti sem tekið var í notkun haustið 2022.

Nemendur geta keypt sér staka máltíð eða áskrift í mötuneytið. Nemendur á heimavist eru sjálfkrafa skráð í fæði fimm daga vikunnar.

Matseðill birtist í upphafi hverrar viku á heimasíðu skólans 

Verð ég að eiga fartölvu?

Það er gert ráð fyrir að allir nemendur hafi sína eigin fartölvu í náminu. Stór hluti námsins fer fram á kennsluvefnum Moodle.

Get ég fengið nám úr öðrum skóla metið?

Reynt er að meta allt nám sem hægt er á milli skóla í samráði við áfangastjóra skólans.