Nemendur á flakki í erlendu samstarfi

Það hefur verið nóg um að vera hjá nemendum okkar í erlendu samstarfi síðastliðnar vikur með styrkjum frá Erasmus+ áætluninni.

Þeir Viktor Óli, Arnar og Pálmi nemendur í rafvirkjun héldu til Svíþjóðar þann 1. febrúar s.l. þar sem þeir heimsóttu verkmenntaskóla í Uppsala, Uppsala Yrkegymnasium í Jälla. Þar tóku þeir þátt í skólastarfi hjá samnemendum sínum í rafvirkjanámi í 4 daga ásamt því að fá innlit í áhugaverðar kennslustundir sem kenndar eru við skólann s.s. við dýravörslu.

Strákarnir dvöldu í gistingu í miðbæ Uppsala og eyddu svo síðasta degi heimsóknarinnar í Stokkhólmi þar sem þeir fengu að sjá og upplifa höfuðborg Svíþjóðar.

 

Viku síðar fóru þrír nemar úr vélstjórnarnámi þeir Finnur Örn, Magnús Ari og Júlíus Laxdal ásamt Hildi Dröfn kennara í rafiðngreinum til Ítalíu og kynna sér vélstjórnarnám við skólann IIS Roncalli sem staðsettur er í Poggibonsi. Flogið var til Mílanó og einn dagur tekinn í miðbæ borgarinnar áður en haldið var með lest til Poggibonsi en við í VA höfum átt gott samstarf við skólann þar síðastliðin ár. Hápunkti ferðarinnar var eflaust náð þegar farið var í dagsferð til Modena og Maranello þar sem höfuðstöðvar Ferrari fyrirtækisins eru staðsettar og tvö Ferrari söfn heimsótt Museo Ferrari sem staðsett er í Maranello og Museo Casa Enzo Ferrari sem staðsett er í Modena.